देउखुरी (दाङ) । लुम्बिनी प्रदेश सभाका सदस्य अम्बिका काफ्ले पदमुक्त हुनु भएको छ । बांके जिल्ला निवासी काफ्ले समानुपातिकबाट जनता समाजवादी पार्टीको प्रतिनिधित्व गर्दे प्रदेश सभामा प्रवेश गर्नु भएको थियो ।
अध्यक्ष उपेन्द्र यादवको नजिकको खास पात्र काफ्ले पार्टीको केन्दीय सदस्य हुनुहुन्छ । पछिल्लो समय लुम्बिनी प्रदेश सरकारलाई समर्थन दिने विषयमा पार्टी भित्रको द्धन्दको शिकार काफ्ले हुनु भएको पार्टी श्रोतको भनाई छ । सरकारलाई समर्थन दिनु भएका संसदीय दलका नेता सन्तोष कुमार पाण्डेय, भण्डारीलाल अहिर, आदेश अग्रवाल र हेमा वेलवासेलाई पार्टीले साधारण सदस्य समेत नरहने गरी कार्वाही गरेको जनाएको थियो । पार्टीको केन्द्रीय अध्यक्ष उपेन्द्र यादव र केही पदाधीकारीको जोडबलमा यस्तो निर्णय भएकाले कार्वाही फुकुवा हुनेमा उहांहरु विश्वस्त हुनुुहुन्छ । पार्टीको लुम्बिनी प्रदेशमा केन्द्रीय सदस्य तथा लुम्विनी प्रदेश अध्यक्ष समेत रहनु भएका पाण्डेयको बलियो पकड रहेको छ ।
साविक लोकतान्त्रिक समाजवादी पार्टी नेपाल र जनता समाजवादी पार्टी नेपाल एकीकरण भएपनि अहिले नेताहरुमा जुंगाको लडाई जारी छ । अध्यक्ष उपेन्द्र यादवको निर्देशनमा काफ्लेले लुम्बिनी प्रदेश सरकारलाई समर्थन गर्नु भएको थिएन । पार्टीको आन्तरिक द्धन्दको कारण प्रदेश सभा सदस्य काफ्लेको पद गुमेको हो ।
संसदीय दलको ह्वीप अटेर गरी काफ्लेले पार्टीको हित विपरित कार्य गरेकाले पटक–पटक स्पष्टीकरणको मौका दिएको तर त्यसको बेवास्ता गरी पार्टी र संसदीय दलको निर्णयको विपरित कार्य गरीरहेकाले काफ्लेलाई प्रदेश सभा सदस्य पदबाट निष्काशन गर्ने संसदीय दलले भदौ ८ गते निर्णय गरेको थियो ।
दलका नेता सन्तोष कुमार पाण्डेले राजनैतिक दल सम्बन्धी ऐन २०७३ को दफा ३४ (१) बमोजिम प्रदेश सभाका सचिवलाई भदौ ९ गते पत्र लेखी सो सम्वन्धी जानकारी गराउनु भएको थियो ।
उक्त पत्र सभामुख तुलाराम घर्ती मगर समक्ष पेश गरिएपछि प्रदेश सभा बैठक चालु नरहेको अवस्थामा कानुनी व्यवस्थाअनुसार सचिवालयको सूचनापाटीमा सूचना प्रकाशन गर्न निर्देशन दिइएको थियो ।
प्रदेश सभा सचिव दुर्लभकुमार पुन मगरले जारी गरेको सूचनामा काफ्लेको दल त्यागसम्बन्धी विवरण सार्वजनिक गरिएको उल्लेख छ । सूचनामा पार्टीले प्रदेश सभा सदस्य पदबाट निष्काशन गरेको जानकारीलाई कानुनी प्रक्रियाअनुसार सचिवालयले प्रकाशन गरेको जनाइएको छ ।
लुम्बिनी प्रदेश सभा सचिवालयले आज दल त्याग सम्बन्धि सुचना जारी गरि यस्तो जानकारी गराएको हो ।
यस्तो छ लुम्बिनी प्रदेश सभाले जारी गरेको दल त्याग सम्बन्धि सूचना
(सम्वत २०८३ साल भाद्र २४ गते बुधबार )
जनता समाजवादी पार्टी, नेपाल लुम्बिनी प्रदेश सभाको संसदीय दलको कार्यालयबाट च.नं. १०, मिति २०८३/०५/०१ को लुम्बिनी प्रदेश सरकारका माननीय मुख्यमन्त्री श्री चेतनारायण आचार्यज्यू माथि प्रदेश सभाको विश्वास छ भन्ने पक्षमा मतदान गर्ने सम्बन्धमा द्वीप जारी गरिएको पत्रसमेत संलग्न राखी च.नं. १८, मिति २०८३/०५/०९ गते “जनता समाजवादी पार्टी नेपालको लुम्बिनी प्रदेश सभा संसदीय दलको मिति २०८३/०५/०८ गतेको निर्णय र सिफारिस बमोजिम पार्टी केन्द्रीय समितिमा छलफल भै माननीय अम्बिका काफ्लेलाई पटक–पटक स्पष्टीकरणको मौका दिँदा समेत उहाँले बेवास्ता गरी पार्टी र संसदीय दलको निर्णयको विपरीत कार्य गरी रहनु भएकोले निज माननीय अम्बिका काफ्लेलाई प्रदेश सभा सदस्य पदबाट निष्काशन गर्ने गरी गरिएको पार्टी केन्द्रीय समितिको पत्र यस साथ संलग्न राखी राजनीतिक दल सम्बन्धी ऐन, २०७३ को दफा ३४ (१) बमोजिम जानकारी गराउँदैछु” भन्ने व्यहोराको पत्र यस सचिवालयमा प्राप्त भएकोमा माननीय सभामुखज्यू समक्ष पेश गर्दा “हाल प्रदेश सभाको अधिवेशन चालु नरहेको अवस्थामा राजनीतिक दल सम्बन्धी ऐन, २०७३ को दफा ३५ को उपदफा (२) बमोजिमको सूचना सचिवालयको सूचनापाटीमा टाँस्ने गरी आवश्यक कारवाही गर्ने” निर्देशनानुसार राजनीतिक दल सम्बन्धी ऐन, २०७३ को दफा ३५ को उपदफा (२) तथा लुम्बिनी प्रदेश सभा नियमावली, २०७९ को नियम १९६ बमोजिम हाल प्रदेश सभाको बैठक चालु नरहेकोले यो दल त्याग सम्बन्धी सूचनापत्र प्रकाशन गरिएको व्यहोरा जानकारीका लागि अनुरोध छ।
(दुर्लभ कुमार पुन मगर)
प्रदेश सभा सचिव