बुटवल । बुटवल-६ नेपालगञ्जरोड स्थित एक पसलबाट नक्कली नेपाली नोट छाप्ने तथा कारोबारमा संलग्न रहेको आरोपमा ६ जना पक्राउ परेका छन् ।
इलाका प्रहरी कार्यालय बुटवलबाट खटिएको प्रहरीले उनीहरूको साथबाट १ हजार दरका ६२२ थान नक्कली नोट बरामद गरेको छ, जसको मूल्य ६ लाख २२ हजार रुपैयाँ बराबर छ ।
पक्राउ पर्नेमा बुटवल उपमहानगरपालिका– ११ निवासी ३६ वर्षीया गंगाकुमारी पूर्वछाने, कास्कीको पोखरा महानगरपालिका– १ निवासी किरणकृष्ण तिवारी (कृष्ण), कपिलवस्तुको बाणगंगा नगरपालिका– १ निवासी सञ्जय थारू, भक्तपुरको चाँगुनारायण नगरपालिका– १ निवासी ४१ वर्षीय रामचन्द्र खत्री, दोलखाको शैलुङ गाउँपालिका– ४ निवासी ३८ वर्षीय पासाङ तामाङ तथा भारतको पश्चिम बंगाल राज्य, सिलिगुडीस्थित भक्तिनगर थाना क्षेत्रका ४९ वर्षीय वासुमित्र आनन्द रहेका छन्।
प्रहरीले घर तथा कोठा खानतलासी गर्ने क्रममा रु. एक हजार दरका ६२२ थान नक्कली नेपाली नोट (जम्मा रु. ६ लाख २२ हजारबराबर), फोटोकपी मेसिन, डेल कम्पनीको ल्यापटप, प्रिन्टर, नक्कली नोट छाप्न प्रयोग हुने कागजको एक कार्टुन, लेमिनेसन मेसिन, विभिन्न केमिकल, प्लास्टिक पेपर, नक्कली नोट काट्ने मेसिन तथा ६ थान मोबाइल फोन बरामद गरेको इलाका प्रहरी कार्यालय बुटवलका प्रनाउ निशान्त श्रीवास्तवले जानकारी दिनुभयो।
पक्राउ परेका सबैमाथि मुद्रसम्बन्धी कसुरअन्तर्गत मुद्दा दर्ता गरी थप अनुसन्धान भइरहेको प्रहरीले जनाएको छ ।