दोस्रो क्यानन सेभेन ए साइड फुटबल प्रतियोगिता हुँदै

बुटवल – बुटवल-८ सुख्खानगरस्थित क्यानन माध्यामिक विद्यालयको आयोजनामा दोस्रो क्यानन सेभेन ए साइड फुटबल प्रतियोगिता २०८२ हुने भएको छ । फुटबल खेललाई ब्राण्डको रुपमा स्थापित गरी खेलाडी उत्पादन गर्ने उद्देश्यसहित यहीँ मंसिर १४ गते आइतबारदेखि प्रतियोगिता गर्न लागिएको हो ।
शुक्रबार विद्यालयले पत्रकार सम्मेलन गरि ‘सँगै हामी सक्छाै’ भन्ने नारा सहित प्रतियाेगिता गर्न लागिएकाे जानकारी गराएकाे हाे । प्रतियोगितामा २७ विद्यालयका ३० टिमबीच प्रतिष्पर्धा हुने विद्यालयका प्राचार्य शंकर भण्डारीले जानकारी दिनुभयो । पहिलो संस्करणको सफलताबाट प्रेरित भएर यो वर्ष झनै सुदृढ र व्यवस्थित रुपमा प्रतियोगिता आयोजना गरिएको जानकारी दिनुभयो । विद्यालयले फुटबल सहित चित्रकला, नृत्य तथा अन्य कुनै पनि अतिरिक्त क्रियाकलापकाे शुल्क नलिएकाे उहाँले बताउनु भयो ।
विद्यालयका सहप्राचार्य विष्णु प्रसाद न्याैपानेले क्यानन स्कुलले जिल्ला स्तरमै खेलकुदकाे विकास, खेलाडीकाे क्षमता अभिवृद्वि गर्दै खेलप्रति विद्यार्थीकाे आकर्षण बढाउन प्रतियोगिता गरिएकाे बताउनु भयो । प्रतियोगितामा २६ संस्थागत र ४ सामुदायिक विद्यालयको सहभागिता रहने छ । १९ गतेसम्म चल्ने प्रतियोगिता सिद्देश्वरी माविको खेल मैदानमा सञ्चालन हुनेछ ।
प्रतियोगितामा विजेता टिमले ५५ हजार ५५५, उपविजेताले ३३ हजार ३३३, उत्कृष्ट खेलाडीले ३ हजार, उत्कृष्ट गोलरक्षक र गाेल स्काेरलाई ३ हजार, हरेक खेलको म्यान अफ दिन म्याचले ५५५ रुपैयाँ प्राप्त गर्ने खेल संयोजक पवन बस्यालले जानकारी दिनु भयो।
गत वर्षको विजेता स्कलर्स होम बोर्डिङ स्कूल र नविन कदरबहादुर रीता मावि रहेका थिए । प्रतियोगिता सम्पन्न गर्न ५ लाख ६० हजार रुपैयाँ खर्च लाग्ने विद्यालयका प्राचार्य भण्डारीको भनाइ छ । विद्यालयले पढाईसँगै अतिरिक्त क्रियाकलापलाई पनि जोड दिएको छ । केही दिनमा लगतै कक्षा ४ देखि ७ सम्मका विद्यार्थीलाई चाइनिज भाषा पनि सिकाउने गरी कक्षा सञ्चालनको तयारीमा रहेकाे छ ।